LPL ප්‍රධාන අනුග්‍රාහකත්වයට My11Circle පැමිණෙයි
මෙම මස 26 වැනිදා හම්බන්තොටදී ආරම්භවීමට නියමිත ලංකා ප්‍රිමියර් ලීග් ක්‍රිකට් පන්දුවාර විස්සයි-20 ලීග් ක්‍රිකට් තරගාවලියේ ප්‍රධාන අනුග්‍රාහකයා වශයෙන් වූ ගණුදෙණුව සඳහා ඉන්දීය වෙළෙඳ නාමයක් සහිත My11Circle ආයතනය ඉදිරිපත්ව තිබේ. ඉන්දියානු වෙළෙඳපොළේ පවතින මනංකල්පිත ක්‍රීඩා වේදිකා අතර (fantasy sports platforms) ඉදිරියෙන්ම සිටින ආයතනයක් වන My11Circle ආයතනය ඉදිරිපත්වීමත් සමඟ තරගාවලියේ නාමය ” My11Circle ලංකා ප්‍රිමියර් ලීග්” තරගාවලිය ලෙසින් හඳුන්වනු ඇත.
ඉන්දියානු සමාගමක් වන Games24x7 යටතේ පවතින ජනප්‍රිය ක්‍රීඩා වේදිකාවක් වන My11Circle වෙබ් අඩෙවිය 2019 වසරේදී ආරම්භ කිරීමෙන් පසු වසරක් වැනි කෙටි කාලයක් ඇතුළත එරට ෆැන්ටසි ක්‍රීඩා අතර ඉහළම ක්‍රීඩා වේදිකාවක් බවට පත්වීමට සමත්ව තිබේ. ක්‍රීඩකයකුට සෘජුවම කණ්ඩායමක් සකසා ගනිමින් ජනප්‍රිය ක්‍රීඩකයින් සමඟ ක්‍රීඩා කිරීම වෙනුවෙන් ඉඩකඩ සලස්වා දෙන ලද පළමු ෆැන්ටසි වේදිකාවට බවට පත්ව තිබෙන My11Circle හි සන්නාම තානාපතිවරයා වශයෙන් හිටපු ඉන්දීය ක්‍රිකට් නායක සව්රව් ගංගුලි මහතා කටයුතු කරනු ලබයි.
මෙම අනුග්‍රාහකත්වය ලබාදීම පිළිබඳව අදහස් දක්වා සිටින My11Circle හි සන්නාම සහ අළෙවිකරන උපාය මාර්ග අධ්‍යක්ෂ අවික් දාස් කනුගෝ මහතා “අපේ ෆැන්ටසි ක්‍රීඩා වේදිකාව වන My11Circle මේ වන විට ඉන්දියාවේ ජනප්‍රියත්වයට පත්ව තිබෙන අතර එය වීරයන් සමඟ ක්‍රීඩා (Play with Champions) කරන වේදිකාව විදියට පොදුවේ හඳුන්වනු ලබනවා. මෙය ක්‍රීඩා ලෝලීන්ට අතරට ගෙන යෑම වෙනුවෙන් අඛණ්ඩව දරන උත්සාහයේ කොටසක් ලෙසින් අපි ලංකා ප්‍රිමියර් ලීග් තරගාවලිය සමඟ සම්බන්ධවීමට හැකිවීම ගැන සතුටට පත්වෙනවා. ඒ අනුව My11Circle LPL තරගාවලිය ඉදිරියේදී ලොව තරගකාරීම ක්‍රීඩා ලීගයන් අතරg එක්වේවි කියලා අපි තරයේ විශ්වාස කර සිටිනවා. මෙම හවුල්කාරීත්වය තුළින් අපි මූලිකවම බලාපොරොත්තු වෙන්නේ කළාපයෙන් සහ දේශසීමාවෙන් එහාට යමින් වැඩි ක්‍රිකට් ලෝලීන් පිරිසකට අපේ ෆැන්ටසි ක්‍රීඩාව සන්නිවේදනය කිරීමයි”යි යනුවෙනි.
අදාළ අනුග්‍රාහකත්වය ලබාදීමට ඉදිරිපත්වීම සම්බන්ධව අදහස් දක්වා සිටින එල්.පී.එල්. තරගාවලියේ අධ්‍යක්ෂක ශ්‍රී ලංකා ක්‍රිකට් ආයතනයේ උප සභාපති රවීන් වික්‍රමරත්න මහතා, “ලංකා ප්‍රිමියර් ලීග් තරගාවලියේ ප්‍රධාන අනුග්‍රාහකත්වයට My11Circle පැමිණීම අපි සාදරයෙන් පිළිගන්නවා. මෙම තරගාවලියේ ප්‍රධාන අනුග්‍රාහකයා ලෙසින් පැමිණීමට ඔවුන් දක්වපු කැමැත්ත එල්.පී.එල්. සන්නාමයට හොඳ සාක්ෂියක්” යනුවෙනි. ශ්‍රී ලංකා කිකට් ආයතනය සහ අයි.පී.ජී. ආයතන එක්ව සංවිධානය කරනු ලබන ලංකා ප්‍රිමියර් ලීග් ක්‍රිකට් තරගාවලිය මෙම මස 26 වැනිදා සිට දෙසැම්බර් මස 16 වැනිදා දක්වා හම්බන්තොට මහින්ද රාජපක්ෂ ක්රීඩාංගණයේදී පැවැත්වෙනු ඇත. කණ්ඩායම් 5 කගේ සහභාගිත්වයෙන් පැවැත්වෙන මෙම තරගාවලිය අවසන් මම තරගයද සමඟ සමස්ථ තරග 23 කින් සමන්විත වේ.
The post LPL ප්‍රධාන අනුග්‍රාහකත්වයට My11Circle පැමිණෙයි appeared first on Sri Lanka Cricket.
