ප්රථම 20-20 තරගයෙන් ශ්රී ලංකාවට ඓතිහාසික ජයග්රහණයක්
මීර්පූර් හි පැවැති ශ්රී ලංකා-බංග්ලාදේශ ප්රථම 20-20 තරගයේ දී බංග්ලාදේශය ඕවර 20 ක දී සිය ක්රිකට් ඉතිහාසයේ ලබාගත් වැඩිම ලකුණු සංඛ්යාව වූ ලකුණු 193 (කඩුලු පහකට) හඹාගිය ශ්රී ලංකාව තමන්ගේ ක්රිකට් ඉතිහාසයේ දී වැඩිම ලකුණු සංඛ්යාව හඹා ගොස් (කඩුලු 4ට 194යි) ජයගත්තේ තවත් පන්දු විස්සක් (ඕවර 3.2ක්) ඉතිරිව තිබියදී ඉතාමත් පහසු ආකාරයෙනි.
ලකුණු 194 ජයග්රාහී ඉලක්කය කරා යාමට පැමිණි ශ්රී ලංකා පිතිකරුවන් සියලුදෙනා ම පාහේ දැඩි ආක්රමණශීලී පිළිවෙතක් අනුගමනය කරමින් ලකුණු රැස් කළේ ඕවරයකට සාමාන්ය ලකුණු 11.64ක් ලබාගනිමිනි.
මෙහිදී ආරම්භක පිතිකරුවන් වූ කුසල් මෙන්ඩිස් පන්දු 27ක දී හතරේ 08ක් හයේ 02ක් සමඟ ලකුණු 53ක් ද, ධනුෂ්ක ගුණතිලක පන්දු 15ක දී හතරේ 06ක් සමඟ ලකුණු 30ක් ද ලබා මුල් විකට්ටුවට ඕවර 4.5ක දී ලකුණු 53ක් රැස්කර ඉතා හොඳ ආරම්භයක් ලබාගත්හ. උපුල් තරංග (04) සහ නිරෝෂන් දික්වැල්ල (11) පමණක් අඩු ලකුණු සංඛ්යාවන්ට දැවී ගියත්, දසුන් ශානක හා තිසර පෙරේරා පස්වන කඩුල්ලට පිටිය පුරා හයේ හතර පහර එල්ල කරමින් ඕවර පහකදී (පන්දු 30ක දී) නොදැවී ලකුණු 65ක සබඳතාවක් තබා ගනිමින් ශ්රී ලංකාව අනගි ජයග්රහණයක් කරා ගෙන ගියහ.
දසුන් ශානක පන්දු 24ක දී හයේ පහර 03ක්, හතරේ පහර 03ක් සමඟ නොදැවී ලකුණු 42ක් ද, තිසර පෙරේරා පන්දු 18ක දී හයේ පහර 03ක්, හතරේ පහර 04ක් සමඟ නොදැවී ලකුණු 39ක් ද ලබාගනිමින් ශ්රී ලංකා ජය තහවුරු කළහ.
ශ්රී ලංකාව ලකුණු 50 (ඕවර 4.3), ලකුණු 100 (ඕවර 9.5), ලකුණු 150 (ඕවර 14) ලබාගත්තේ සියලු බංග්ලාදේශ පන්දු යවන්නන් දැඩි ප්රහාරයකට ලක්කරමිනි. බංග්ලාදේශයේ දී වැඩිපුර ම ලකුණු ප්රමාණයක් හඹාගොස් කණ්ඩායමක් ජයගත් ප්රථම අවස්ථාව ද මෙය වේ. තරග දෙකකින් සමන්විත 20-20 තරගාවලියේ දැන් ශ්රී ලංකාව 1-0කින් ඉදිරියෙන් සිටින අතර, දෙවන තරගය පැවැත්වෙන්නේ පෙබරවාරි 18 වැනි දා ය. ප්රථම 20-20 තරගයේ වීරයා ලෙස නම් කැරුණේ කුසල් මෙන්ඩිස් ය.
කාසියේ වාසිය දිනාගත් බංග්ලාදේශය මුලින් පන්දුවට පහරදීමට තීරණය කර, ඕවර 20 අවසානයේ කඩුලු පහකට ලබාගත් ලකුණු 193 අනුව ඔවුන් ඕවරයකට ලබා ඇති සාමාන්ය ලකුණු ප්රමාණය 9.65කි. මෙය බංග්ලාදේශය 20-20 තරගයක ඕනෑම කණ්ඩායමක් සමඟ ලැබූ වැඩිම ලකුණු සංඛ්යාවයි. මීට පෙර ඔවුනගේ වැඩිම ලකුණු සංඛ්යාව වූයේ ලකුණු 190කි.
බංග්ලාදේශය ප්රථම ඕවර දහය නිම වනවිට කඩුල්ලකට ලකුණු සියයක් ද, ඊළඟ ඕවර දහයේ දී කඩුලු හතරක් දැවී තවත් ලකුණු 93ක් ද රැස් කළහ. ඔවුන් ප්රථම ඕවරයේ සිට ම ලකුණු සංඛ්යාව ඕවරයකට ලකුණු 9-10 පමණ වන සේ රැස් කිරීමට වගබලා ගත්හ ප්රථම කඩුල්ලට සකිර් හොසේන් (10) හා සෞම්ය සාකර් (51) ඕවර හතරකදී එක් කළ ලකුණු ප්රමාණය 49කි.
මේ අවස්ථාවේ හොසේන් දැවී ගිය අතර, අංක 3 පිතිකරු ලෙස පැමිණි මුෂ්ෆිකර් රහිම්ගේ ඉනිම වටා බංග්ලාදේශයේ ඉතිරි ඕවර 16 ම රැඳී පැවැතිණි. මුෂ්ෆිකර් රහීම් ඕවර 20වන තුරු නොදැවී කඩුල්ලේ රැඳී ලකුණු 66ක් ලබාගත්තේ පන්දු 44ක දී හතරේ 07ක් සහ හයේ 05ක් සමඟිනි.
මුෂ්ෆිකර් රහිම් දෙවන කඩුල්ලට සෞම්ය සාකර් (51) සමඟ ලකුණු 51ක සබඳතාවක් ද, සිව්වන කඩුල්ලට මහමදුල්ලා (පන්දු 31යි හතරේ 02යි හයේ 02යි) සමඟ ලකුණු 73ක සබඳතාවක් ද තබාගත්හ. ශ්රී ලංකා පන්දු යවන්නන් අතුරින් කැපී පෙනුණු කුසල් මෙන්ඩිස් ඕවර 03ක් යවා ලකුණු 21ක ට කඩුලු 02ක් දවාලූවේය. මේ ඉනිමේදී ශ්රී ලංකාව අතිරේක ලකුණු 21ක් ද ලබාදුන් අතර, ඒවා සියල්ලම කඩුල්ලෙන් ඈතට යැවුණු වයිඩ් පන්දු ලෙස සටහන් විණි.
ශ්රී ලංකා 20-20 සංචිතයට නම්කර සිටි කුසල් ජනිත් පෙරේරා සහ අසේල ගුණරත්න තරගාවලිය ආරම්භ කිරීමට පෙර ම පුහුණුව ලබද්දී ආබාධ ලබා, ආපසු ශ්රී ලංකාවට පැමිණියහ. කුසල් ජනිත් වෙනුවට එහි යැවුණු කුසල් මෙන්ඩිස් ඔහුට ලැබුණු අවස්ථාවෙන් අර්ධ ශතකයක් ලැබීම විශේෂත්වයකි.
– බන්දුල මොල්ලිගොඩ –
-The opinions expressed here are the views of the writer and do not necessarily reflect the views and opinions of Sri Lanka Cricket-