ඉන්දියාව අවසාන තරගයට සුදුසුකම් ලබයි
නිදහස් කුසලාන තුන්කොන් ක්රිකට් තරගාවලියේ ඉන්දියාව හා බංග්ලාදේශය අතර බදාදා (14) පැවැති තරගයෙන් ලකුණු 17ක ජයක් අත්කරගත් ඉන්දියාව ඉරිදා (18) පැවැත්වෙන අවසාන මහා තරගයට සුදුසුකම් ලැබීය.
ඉන්දියාව මෙදින මෙම තරගාවලියේ තෙවන ජයග්රහණය වාර්තා කළේ මුලින් පන්දුවට පහරදී ඕවර 20 අවසානයේ කඩුලු තුනකට ලකුණු 176ක් ලබා පසුව බංග්ලාදේශ පිල ඕවර 20දී කඩුලු හයකට ලකුණු 159ක ට සීමා කරමිනි. මූලික වටයේ දී බංග්ලාදේශය හා ඉන්දියාව අතර පැවැති තරග දෙකේදීම ජයගත්තේ ඉන්දියාවයි.
ලීග් ක්රමයට පැවැති මුල් වටයේ දී ප්රථම තරග තුනේ දීම අසාර්ථක වූ ඉන්දීය නායක හා ආරම්භක පිතිකරු රොහිට් ෂර්මා අවශ්ය වේලාවේ දී නැවත ලකුණු අතරට එමින් පන්දු 61ක දී හතරේ පහක් හයේ පහක් සමග ලකුණු 89ක් රැස්කරමින් තරගයේ වීරයා බවට ද පත්විය. ෂර්මා දැවී ගියේ අවසාන පන්දුවේදීය. මීට අමතරව සුරේෂ් රයිනා පන්දු 30ක දී හතරේ පහක් හා හයේ දෙකක් සමග ලකුණු 47ක් ද අනෙක් ආරම්භක පිතිකරු ශිකර් ධවාන් පන්දු 27ක දී හතරේ පහක් හයේ පහරක් සමග ලකුණු 35ක් ද රැස්කළහ.
ඉන්දියාව මේ තරගයේ දී ලබාගත්තේ වේගයෙන් අඩු වූ ආරම්භයකි. ප්රථම ඕවර දහයේ දී ලකුණු 59ක් පමණක් රැස් කළත් ඊළඟ ඕවර දහයේ දී ඔවුන් ලකුණු 117ක් රැස් කලේ ඕවරයකට සාමාන්ය ලකුණු 11.7ක් වන පරිදිය. ප්රථම විකට්ටුවට ෂර්මා සහ ධවාන් පන්දු 59ක දී ලකුණු 70ක් පමණක් ලැබුව ද දෙවන කඩුල්ලට ෂර්මා හා රයිනා පන්දු 56ක දී ලකුණු 102ක් රැස් කරමින් එම තත්ත්වය සම්පූර්ණයෙන්ම වෙනස් කිරීමට සමත්විණි.
බංග්ලාදේශය පන්දුවට පහරදීමට පැමිණි අවස්ථාවේ වොෂිංටන් සුන්දර්ගේ විශිෂ්ට පන්දුයැවීම හමුවේ ඉනිම ආරම්භය කඩාවැටුණේ ලිටන් දාස් (07) සෞම්ය සාකර් (01) සහ ටමීම් ඉක්බාල් (27) මුළු ලකුණු 40ක් වනවිට දැවී යාමෙනි. සුන්දර් මෙදින ලකුණු 22ක ට කඩුලු තුනක් දවා තම හොඳම පන්දු යැවීම සිදුකළේය. පස්වන කඩුල්ලට මුෂ්ෆිකර් රහීම් සමග ෂබීර රහ්මන් (27) පන්දු 48ක දී ලකුණු 65ක් රැස් කළත් ඉනිම අගදී ලකුණු රැස් කිරීමේ වේගය ප්රමාණවත් නොවීය.
ශ්රී ලංකාව සමඟ තරගයේ දී නොදැවී 72ක් ලබා බංග්ලාදේශය ජයග්රහණය කරා ගෙන ගිය මුෂ්ෆිකර් රහීම් ඉන්දියාව සමඟ ද පන්දු 55ක දී හතරේ අටක් හා හයේ පහරක් සමගා නොදැවී 72ක් රැස් කළත් ජයග්රහණය කරා යාමට එහා කෙළවරේ පිතිකරුගෙන් ඔහුට සහයක් නොලැබිණි.
ඉන්දියාව ඕවර 20දී කඩුලු 3ට 176යි. බංග්ලාදේශය ඕවර 20 දී කඩුලු 6ට 159යි.
– බන්දුල මොල්ලිගොඩ –
-The opinions expressed here are the views of the writer and do not necessarily reflect the views and opinions of Sri Lanka Cricket-