අභාවප්රාප්ත දී මූ ජයරත්න මහතාගේ දේහය පිළිබද අවසන් කටයුතු ලබන සෙනසුරාදා
අභාවප්රාප්ත හිටපු අග්‍රාමාත්‍ය දී මූ ජයරත්න මහතාගේ දේහය පිළිබද අවසන් කටයුතු ලබන සෙනසුරාදා ( 23) ගම්පොලදී සිදුකිරීමට නියමිතයි. ඒ මහතා මිය යනවිට 88 වන වියේ පසුවුණා.
1931 වසරේ ජූනි මස 7 වනදා උපත ලැබූ දී මූ ජයරත්න මහතා දොළුව මහා විද්‍යාලයෙන් අධ්‍යාපනය ලැබුවා. ඒ මහතා ශ්‍රී ලංකා නිදහස් පක්ෂයේ ආරම්භක යුගයේදීම එම පක්ෂය සමග එක්වුණා. දී මූ ජයරත්න මහතා ශ්‍රී ලංකා නිදහස් පක්ෂයේ 13 වන සාමාජිකයායි. 1970 මහ මැතිවරණයේ දී ගම්පොල මැතිවරණ කොට්ඨාසය ජය ගනිමින් පාර්ලිමේන්තුවට පැමිණි ඒ මහතා 1977 මහ මැතිවරණයේදී පාර්ලිමේන්තුවට තේරී පත්වූ ශ්‍රී ලංකා නිදහස් පක්ෂ මන්ත්‍රීවරුන් අට දෙනාගෙන් එක් අයෙකු වනවා.
1994 වසරේ පිහිටවූ චන්ද්‍රිකා බණ්ඩාරනායක කුමාරතුංග මහත්මියගේ රජයේ ඉඩම් කෘෂිකර්ම හා වන සංරක්ෂණ අමාත්‍යවරයා ලෙස දී මූ ජයරත්න මහතා මුල්වරට කැබිනට් මණ්ඩලයට එක්වුණා. අමාත්‍ය ධුර රැසක් දැරූ ඒ මහතා 2010 වසරේ අප්‍රේල් 21 වනදා අග්‍රාමාත්‍යවරයා ලෙස දිවුරුම් දුන්නා. දරුවන් තුන් දෙනෙකුගේ පියෙකු වන ඒ මහතා සමාජ සේවා රැසක් ඉටුකර තිබෙනවා. අම්බුලුවාව ජෛව විවිධත්ව සංකීර්ණය සහ ආගමික මධ්‍යස්ථානය ද දී මූ ජයරත්න මහතාගේ නිර්මාණයක්. එය පාලනය වූයේ ද ඒ මහතා ඇතුළත් වූ අම්බුලුවාව පරිසර සංවර්ධන හා සංරක්ෂණ භාරය මගිනි.
මහනුවර පෞද්ගලික රෝහලකදී ඊයේ (19) අභාවප්රාප්ත වූ දී මූ ජයරත්න මහතාගේ දේහය අද (20) දහවල් විශේෂ රිය පෙරහැරකින් ගම්පොල දොළුව නිවස වෙත රැගෙන ඒමට නියමිතයි.
The post අභාවප්රාප්ත දී මූ ජයරත්න මහතාගේ දේහය පිළිබද අවසන් කටයුතු ලබන සෙනසුරාදා appeared first on ITN News.
