ආදාහනයද භූමදානයද තීරණය ගැනීමේ බලය සෞඛ්‍ය කමිටුව සතුයි – රජය කියයි
කොරෝනා වයිරසය ආසාදනය වීමෙන් මරණයට පත් වන පුද්ගලයන්ගේ මෘත දේහ භූමදානය කිරීමට අවසර ලබාදීමට මේ දක්වා තීරණයක් ගෙන නොමැති බව සෞඛ්‍ය අමාත්‍යාංශය අවධාරණය කරනවා.අධිකරණ අමාත්‍යවරයා ද අප කළ විමසීකදී කියා සිටියේ රජය එවැනි කිසිදු තීරණයක් ගෙන නොමැති බවයි.
කොරෝනා වයිරසය ආසාදනය වීමෙන් මිය යන මුස්ලිම් අයගේ දේහයන් භූමදානය කිරීමට රජය අවසර ලබාදී ඇති බව සිලෝන් තවුහිද් ජමාඅත් සංවිධානය පවසනවා. ජනාධිපතිතුමාටත් අගමැතිතුමාටත් ඒ සම්බන්ධයෙන් ස්තුතිය පලකරන බව පවසමින් එම සංවිධානය ඊයේ නිවේදනයක් නිකුත් කර තිබෙන්නේ එහි මහලේකම් අබ්දුර් රාසික් යන අයගේ අත්සනින් යුතුවයි. මෙම ලිපියේ සදහන් කරුණු මුළුමනින්ම අසත්‍ය බව අධිකරණ අමාත්‍ය අලි සබ්රි මහතා අවධාරණය කළා. රජය එවැනි තීරණයක් ගෙන නොමැති බවයි අප කළ විමසීමකදී අමාත්‍යවරයා තවදුරටත් කියා සිටියේ. මේ අතර සෞඛ්‍ය අමාත්‍යාංශයේ මාධ්‍ය ප්‍රකාශක වෛද්‍ය ජයරුවන් බණ්ඩාර මහතා ද මෙම කරුණ අසත්‍ය බව ප්‍රකාශ කළා.
කොරෝනා සම්බන්ධයෙන් රට තුළ එක් නීතියක් තිබිය යුතු බවයි රජයේ වෛද්‍ය නිලධාරීන්ගේ සංගමය පවසන්නේ. රෝගය වැළදෙන්නේ ජාති, ආගම්, පක්ෂ, පාට, භේද සළකමින් නොවේ. එබැවින් සෞඛ්‍ය විද්‍යාත්මක කරුණු පදනම් කරගෙන එම මෘත දේහ පිලිබද අවසන් කටයුතු සිදු විය යුතු බවයි ඔවුන් පෙන්වා දෙන්නේ.
කොරෝනාවලින් මිය යන පුද්ගලයන්ගේ සිරුරු භූමදානය කිරීම ගැන තීරණ ගන්නේ රජය නොව සෞඛ්‍ය අංශ බව පරිසර අමාත්‍ය මහින්ද අමරවීර මහතා පවසනවා. ජාත්‍යන්තර නීති රීති අනුව මෙම මරණ පිළිබද අවසන් කටයුතු සිදු කළ යුත්තේ පරිසරයට හා සෞඛ්‍යයට හානි නොවන ලෙස බවයි අමාත්‍යවරයා පෙන්වා දෙන්නේ.
The post ආදාහනයද භූමදානයද තීරණය ගැනීමේ බලය සෞඛ්‍ය කමිටුව සතුයි – රජය කියයි appeared first on ITN News.
