ගීතවල සම අයිතිය ලබාදීමේ නීති රෙගුලාසි සංශෝධනයට අවධානය
පද රචකයාට සංගීතඥයාට සමානවම ගායකයාටත් ගීතයේ සම අයිතිය ලබා දීමට අදාළව පවතින නීති රෙගුලාසි සංශෝධනය කිරීම සම්බන්ධයෙන් අමාත්ය නලින් ප්රනාන්දු මහතාගේ අවධානය යොමුව තිබෙනවා. ඒ මේ පිළිබද පැවති සාකච්ඡාවකින් අනතුරුවයි.
කතෘ භාගය හා ප්රකාශන හිමිකම සම්බන්ධයෙන් ගීතයක ප්රධාන හිමිකරුවන් වන පද රචකයා, සංගීතඥයා සහ ගායකයා යන පාර්ශ්ව තුනටම සමානව ලබාදීම හා ගායන ශිල්පියාට ගීතයේ නීතිමය අයිතිය සම්බන්ධ ගැටලු සාකච්ඡා කිරීමේ හමුවක් වෙළෙද වාණිජ හා ආහාර සුරක්ෂිතතා අමාත්යාංශයේ දී පැවැත්වුණා. සංගීත වැඩසටහන් හා ඒවායෙහි සැකැස්ම පිළිබද යෝජනා රැගෙන ඒ අනුව ප්රමිතියක් සකස් කිරීමට හා නියාමනයට හැකියාවක් පවතින බව අමාත්යවරයා මෙහිදී පැවසුවා.
යූටියුබ් හා සෙසු සමාජ ජාලා ආශ්රිතව කතෘ හිමිකම සම්බන්ධයෙන් ද අවධානය යොමුවුණා. පොදුවේ ජනතාවට බලපාන නීති උල්ලංඝනය කිරීමකදී නඩු පැවරිය හැකි පරිදී පනත සංශෝධනයට අවශ්ය කටයුතු සොයා බලන ලෙස අමාත්යවරයා නිලධාරීන්ට උපදෙස් ලබාදුන්නා.
සංගීත කණ්ඩායම් සහ විවිධ උත්සව සංවිධාන කරන ආයතන මහජන අයිතිවාසිකම් උල්ලංඝනය කරන්නේ නම් ඒ පිළිබදව ඔවුන් සමග සාකච්ඡාවක් සූදානම් කරන ලෙසයි අමාත්යවරයා නිලධාරීන්ට දැනුම් දුන්නේ. ශ්රී ලංකා ගායක ගායිකා සංගමයේ සාමාජික සාමාජිකාවන් ඇතුළු පිරිසක් මෙම අවස්ථාවට එක්වුණා.
The post ගීතවල සම අයිතිය ලබාදීමේ නීති රෙගුලාසි සංශෝධනයට අවධානය appeared first on ITN News.