පළමු වරට තල් රා කර්මාන්තයේ යෙදෙන 1500කට NVQ 3
ශ්රී ලංකාවේ තල් රා කර්මාන්තයේ යෙදෙන තැනැත්තන් සඳහා පළමුවරට ජාතික වෘත්තිය නිපුණතා සහතිකපත් පිරිනැමීමට තල් සංවර්ධන මණ්ඩලය හා ජාතික ආධුනිකත්ව මණ්ඩලය පියවර ගෙන තිබෙනවා.
ඒ අනුව තල් රා කර්මාන්තයේ යෙදෙන උතුරු හා නැගෙනහිර පළාත්වල පුද්ගලයින් 1500කට විධිමත් පුහුණුවකින් පසු වෘත්තිය නිපුණතා සහතික (NVQ 3) පත්ර පිරිනැමීම ඊයේ (19) සිදුවුණා.
කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතාගේ ප්රධානත්වයෙන් කෘෂිකර්ම අමාත්යාංශයේ දී පැවැති එම සහතික පත් පිරිනැමීමේ දී යාපනය, මඩකලපුව, ත්රිකුණාමලය, කිළිනොච්චි යන ප්රදේශවල තල් රා කර්මාන්තයේ යෙදෙන පුද්ගලයින් 06 දෙනෙකුට අමාත්යවරයා අතින් සහතික පත් පිරිනැමීම සිදුවුණා.
එමෙන්ම මෙම තල් රා මඳින පුද්ගලයින් ව්යවසායකයින් ලෙස සවිබල ගැන්වීම සදහා අවම පොලී මුදලක් යටතේ රුපියල් ලක්ෂ 05ක ණය මුදලක් ප්රදානය කිරීමට ද ලංකා බැංකුව හා ඒකාබද්ධව වැඩ සටහනක් ද ආරම්භ කරනු ලැබුවා.
මෙම රා මඳින තැනැත්තන් සඳහා ජීවිතාරක්ෂාව, අවදානම් කළමනාකරණය, වැනි අංශ සම්බන්ධව විශේෂ පුහුණුවක් ලබා දෙන අතරම එම විදිමත් පුහුණුව ජාතික ආධුනිකත්ව මණ්ඩලය විසින් ලබා දී තිබෙනවා.
මෙහිදී අදහස් පළ කළ අමාත්ය මහින්ද අමරවීර මහතා මෙම වෘත්තිය නිපුණතා සහතික (NVQ 3) පත්ර පොල් හා කිතුල් කර්මාන්තයේ යෙදෙන තැනැත්තන් සඳහා ද ලබා දෙන ලෙස ඉල්ලීමක් කළා.
ඒ අනුව මෙරට පොල් හා කිතුල් රා කර්මාන්තයේ යෙදෙන පුද්ගලයින්ට ද එම පුහුණුව ලබා දීමට අවශ්ය විෂය නිර්දේශ මේ වනවිටත් සකස් කර ඇතැයි ජාතික ආධුනිකත්ව මණ්ඩලය පැවසුවා.
දැනට අප රටේ තල් ගස් මිලියන 11ක් තිබුන ද ඉන් නිසි ප්රයෝජන ලබා ගන්නේ සියයට 30ක් වැනි ප්රමාණයක් පමණයි.
ලෝකයේ වැඩිම තල්ගස් ප්රමාණයක් සහිත දෙවන රට වන්නේ ශ්රී ලංකාවයි.
වැඩිම තල් ගස් ප්රමාණයක් ඇති පළමු රට ඉන්දියාව වුවද තල් ආශ්රිත නිෂ්පාදන අතරින් වැඩිම නිෂ්පාදන ප්රමාණයක් සිදු කරන්නේ ශ්රී ලංකාවයි.
එමෙන්ම මුළු ලෝකයටම ඇති එකම තල් පර්යේෂණ ආයතනය තිබෙන්නේ ද ශ්රී ලංකාවයි.
අප රටේ තල් රා සහ තල් අරක්කු සඳහා ජාත්යන්තර වෙළෙඳපළෙහි ඉහළ ඉල්ලුමක් තිබෙනවා.
මේ වනවිට ප්රංශය, කැනඩාව හා ඩුබායි වැනි රටවල්වලට තල් රා සහ තල් අරක්කු අපනයනය කරන අතර වාර්ෂිකව ඩොලර් 45,000ක මුදලක් උපයනු ලබයි.
මෙම අවස්ථාවට තල් සංවර්ධන මණ්ඩලයේ සභාපති ආචාර්ය ක්රිශාන්ත පතිරාජ මහතා ඇතුලු පිරිසක් සහභාගි වුණා.
The post පළමු වරට තල් රා කර්මාන්තයේ යෙදෙන 1500කට NVQ 3 appeared first on ITN News.